我知道我好耐都無update我個blog，亦無回覆過任何msg... 好對唔住大家... 因為近排我真係好攰，我嘅心靈真係好攰好攰。
公司expand搬咗去新地方，工作接踵而來。作為一個員工我嘅責任係減低老闆嘅顧慮並唔係加重佢嘅負擔，加上處女座嘅我有完美性格所以俾自己好大壓力，有好多事都想一個人自己處理咗先。呢個世界有一種天生唔照顧人會死嘅人，而我就係如果達唔到自己set嘅要求會因為自責而對自己失望死嘅人。好可惜今個月有一個客我真係搞極都搞唔掂... 自己承擔咗一個自己完全唔識做嘅project。我孤軍作戰咁不斷去Google問人睇書youtube眼泛淚光咁做咗3星期之後，客人最後都唔係非常滿意... 我個心真係好攰。
近來遇到有好感嘅人 (終於!) 。細個嘅時候最享受曖昧嘅關係，中間亦苦亦甜有無限嘅想像空間覺得係甜蜜嘅。三十歲之後我反而害怕曖昧關係。既然大家都係成年人心知肚明想要啲咩㗎啦，寧願開宗明義講清講楚好過你又要估我諗緊乜我又要猜度你下一句會點回應。曖昧多數有兩種，一種係雙方會進入正式公開關係之前嘅曖昧；另外一種係單方享受戀愛感為曖昧而曖昧。後者嗰種根本就唔會花開結果，而最折磨自己嘅就係處於又係又唔係要猜猜度度嘅地步.... 我個心真係好攰。
由於心真係好攰，每日返到屋企就淨係想坐低休息乜都唔想做，但係瞓覺嘅時候又太多野諗瞓嘅都瞓唔度... 我估短短呢三星期我應該減壽一年... 哈哈！希望我可以趁呢個假期recharge一下心靈唔好再同自己過唔去。
雖然人大咗對節日已經無睇得咁重，但係點解做冬平安夜聖誕節除夕元旦呢啲節日都非要喺兩個禮拜內發生不可呢？😑... 單身嘅朋友們要加把勁!! Anyways 祝大家節日快樂！要安全唷科科😏😏😏！
Search